أضف سؤال أو موضوع جديد          

قطع غيار المتحدة

up 6 down 7
a.ibrahem 3167
قبل 5 سنه و 9 شهر



السلام عليكم ورحمة الله وبركاته ،،،

كالعادة أحب ادخل في صلب الموضوع تلقائياً

موضوعي اليوم هو عن المتحدة وقطع الغيار طبعاً قبل لا اتكلم في الموضوع احب ابين لكم الحمدلله اني شريت شروكي الحمدلله غير الاوبريس عشان محد يقول اني متعصب ولا بذم الوكيل او بذم شركة دوج وكرايسلر وجيب



الموضوع ومافيه اني رحت لقطع الغيار بشتري فحمات وفلتر للشروكي اللي معي وجاء راعي كرايسلر 2011 يبي يشتري زيت مكينة وسأل عن شمعة الكرايسلر معروضه كانت قال له ب 850 تايون قال وينها ياخي من زمان لو ان داري ماشريت من الوكالة ، قال بس الوكالة غير شكل ولا يجيها مويه الخ .... قال يبن الحلال انا شاريها من المتحدة بنفسي ب 7000 ريال ومطارد شهر وثاني يوم غسل ودخلها مويه ولما رجع لهم قالوا ما نضمنها لانها حساسة وممكن جاهاشي وخربت




--------


الثاني قابلته لما رحت اسال عن العامود حق الدركسون معه جراند شروكي 2007 srt مرايته ب 1800 وطلب ويبيلها شهرين او شهر منيب متأكد



---------


والثالث تشارجر 2012 rt يبيله عمود كرنك او الحساس منيب متأكد كان واقف عند الورشة اللي اصلح فيها الشروكي حقي يقول له 5 شهور واقف عندي وراعيه طالب القطعة من الوكالة ولين الحين ماردوا عليه


طبعاً كلامي هذا للي توه متخرج وطايرت به الدنيا يبي كرايسلر ولا تشارجر ولا جراند شروكي عشان شكله وقوة وهيبة ثمن ينصدم لاعرف موضوع قطع الغيار

طبعاً لحد يفسر كلامي غلط اني انصح بعدم شراء هالسيارات او اني اذمها انا اول واحد معجب في الكرايسلر وشريت شروكي رغم اني داري ان وكيلها منتهي بس الغريب موتري قديم 94 شاريه للطعوس قطعته متوفرة في كل محل وان كانها طلبيه من جده ولا غيره يومين وهي عندي وهذولي معهم موديل جديد ويتلطع بالاشهر



اللي عنده أي اضافة بخصوص الموضوع النقاش مفتوح للجميع
وليس للتعصب واللايك والديسلايك


تقبلوا تحياتي ، احمد ابراهيم







إبلاغ إبلاغ


رابط تطبيق حراج للايفون



رابط تطبيق حراج للاندرويد (الجالكسي)



الردود


سيارات الشروكي والكليسر سيارت ممتازه لايعلى عليها لاكن وكيلها دمرها بسوء الخدمات عنده وقطع الغيار الي طلبيه يعني الشيء ذا خل الناس تهرب من ذا الوكيل سيارته لاني مو معقوله اشتري سياره ١٥٠ واكثر اتفاجى من الخدمه صفر 


up 1 down 0
محمد ال سلمان 820
قبل 5 سنه و 9 شهر



بالظبط يا ابوحميد لكن بعضهم ماعنده مشكلة مستعد يتحمل الوكيل ويعرف قطع غيار متعامل معهم يوفرون له القطع وراضي بسعرها وعنده القدرة على شرائها



انا ليش كتبت هالموضوع لأن بعضهم الله يصلحه توه متخرج جندي ولا متوظف في شركة ب 5000 وماصدق كمل 3 شهور وامصع ذاك القرض ولا ايجار منتهي بالتمليك ونزل rt ولا مدري وشوا



وليته يحافظ ويعرف يستخدم مثل هالسيارات هذي تحتاج لعناية تحتاج لواحد سواقته هادية يعني مايصير تعاملها معاملة اكسنت ولا كامري


ولا خربت ولا طلب قطعه انصدم من قطع الغيار وتوهق


انا الحمد لله اعرف اكثر من محل واسأل منا لين احصل اللي ابيه بعضهم مايعرف الا الوكالة ولزخ ويلطعونه


up 2 down 3
a.ibrahem 3167
قبل 5 سنه و 9 شهر



كان مع الوالد جراند شيروكي ليميتد 98 علی قدم موديله الا ان سعر المروحة ب 2000 ريال  يعني الجديد بكم تكون 


سيارات كلايزلر وما تحتها ما عليها غبار لكن وكيلها مغبر 


up 1 down 0
khalidoo 1167
قبل 5 سنه و 9 شهر



الله يخلي النت 
امازون وايباي ومواقع بيع القطع 
الشارقة ودبي بعد لاتنسى 
واللي يبي يعرف يدبر نفسه ما عليه خوف 

الكمخه كمخه 
معه اكسنت ولا يخت 

واللي يبي يدبر نفسه بيدبر نفسه 
واللي يمشي على كلام الوكالة والورش يتحمل ما يجيه 


up 6 down 4
ابو فرح مازدا 538
قبل 5 سنه و 9 شهر



مبروك الموتر يا احمد كم شريته وارسلي صور الموتر
خلني انزلها بحسابي بالانستغرام وحياك الله بحسابي 
ع الانستغرام @ssrfm2004  
حسابي مخصص للجيب الشروكي xj وراح يعجبك 


up 0 down 0
foxzx 1593
قبل 5 سنه و 9 شهر



الله يبارك في عمرك


والله ماعندي الا صورتين اظاهر له يوم اشتريه من راعيه لكن كلمني واتس ولاصورته ارسلته لك ان شاء الله

0565846465


up 0 down 2
a.ibrahem 3167
قبل 5 سنه و 9 شهر



صدقت يا تواوت


لكن انا مثل ماذكرت لك فوق اني كتبت الموضوع عشان اللي ما يحسب حسابه لاجاء يشتري يفكر في سعر السيارة هو قادر عليها شرا ماعنده مشكلة


طبعاً كل سيارة ولها استخدامها ولها وضعها يعني مستحيل انك تشتري مرسيدس وتعامله معاملة اكسنت يطفى ويتشغل في الساعة ثلاث مرات


up 0 down 1
a.ibrahem 3167
قبل 5 سنه و 9 شهر



بخصوص اللي خايف عليهم توه متخرج ويبي سيارة كشخه
هذولي اغلبهم تجي تنصحه مايقبل النصيحه 
فراسه مراهقه وهياط
فخله يندق فهذي السيارات لين يعرف ان الله حق ويقتنع انها ماهي بمستواه  




up 1 down 0
شويخ من أرض مكناس 2824
قبل 5 سنه و 9 شهر



اللي يشتري سيارة المفروض يحسب حساب الصيانة وقطع الغيار لا قدر الله
لان ثمن السيارة مقدور عليه اما كاش او قرض لكن القطع مستقبلا راح ينتظر ويتعب ويمل

وانا استغرب سيارات جديدة المفروضالقطع تكون متوفرة في محلات قطع الغيار والشركات ياريت وزارة التجارة تتحرك بقوة لردع بعض الوكلاء لان الضحية المستهلك


up 1 down 0
العمدة 1434 1189
قبل 5 سنه و 9 شهر



المفروض تلغى وكالته بسبب كثرة للشكاوى عليه يلطع الزبون 5 اشهر
والله هزلت
على اي اساس اخذ وكالة المتحدة وغيرها الوكالة من الشركات المصنعة 
حسب ماذكرت بموضوعك يبوحميد 
الله المستعان والله قهر اطلب قطع من وكيل لها في الاخير سعر خيالي
وانتظار بالاشهر 
اجل كيف السيارات اللي مالها وكيل مثل الونيت الصيني وغيرها
وكلائها معارض بس 
المفروض يكون لكل شركة اكثر من وكيل عشان يهزوا طولهم ويتنافسون
مو كل واحد يتحكم في خلق الله وبالسعر اللي يبغاه هو 


up 1 down 0
ابو عبدالله احمد 3527
قبل 5 سنه و 9 شهر



ياشويخ الله سبحانه وتعالى قال انك لاتهدي من احببت ولكن الله يهدي من يشاء


مهب شرط من كلامي وكلامك الف من الف بيقتنعون ويسوون اللي انت تبيه

انت بنفسك يمكن احد ينصحك في موضوع معين وانت مقتنع باللي في راسك بتسويه صح ولا لا ؟؟؟


لكن اذا كان كلامك منطقي في ناس بتاقف عند كلامك او حتى لو على قولك سوا اللي في راسه لينك مبري الذمة قدك نصحته ولايجي يتشكى ويعاتب بعدين


انا هذي سياستي في الحياة لما احد يقول بطلع اقصاد جديد اعطيه اللي عندي ترى كذا وكذا وكذا وعندك قصد خمس سنين واطرح له حلول واقول له الافضل انك تسوي كذا ، وفي الاخير انت صاحب الشأن واذا شرا انا اول واحد يبارك ويفرح لكني مبري ذمتي باللي عندي


تحياتي لك


up 0 down 1
a.ibrahem 3167
قبل 5 سنه و 9 شهر



انا رحت أقدم وظيفه عندهم في مقر الصيانة الرئيسي في جدة,
و رحت أول يوم حصلت المسؤول في اجتماع ,
 و رحت ثاني يوم قابلته قلي آسف داخل على اجتماع و تعال بكرة
و رحت اليوم اللي بعده انتظرت له ساعتين ماجاء.
الشاهد في كل يوم اروح تحصل مضاربه من الزباين مع الموظفين 
و حسيت بقهر الزباين من الاسلوب و التأخير في الصيانه
وسألت واحد من الموظفين قلي هذي المضاربات والفين عليها !!!
عرفت انهم عندهم ادارة سيئة و تكدس سيارات و مافي قطع .
و صرفت النظر عنهم و انا طالب وظيفه فما بالك بشتري سيارة منهم. 



up 1 down 0
amer ahmed 567
قبل 5 سنه و 9 شهر



ابراهيم
انا ما انصح شخص هو مقتنع في شي

ماقد جى احد طرح موضوع الا سئل عن سيارة هل ياخذها او لا
فهذي الحالة نجيي ننصحه

اما يجي شخص يقول انا مقتنع في سيارة وابي اشتريها خلاص فهذا مافي داعي تنصحه ولاراح يتقنع فكلامك الا بعد مايجرب وبكيفه

وعلى راسهم ولد خالي
قبل فتره ولد خالي طلع سوناتا وكان عندي فقلي وش رايك ؟
عطيته النصيحه على سيارة معينه واخر شي قال اصلا ابي سوناتا  !!!

طيب ليه تسئلني اذا انت مقتنع فيها  ؟
المهم طلع السيارة وماكمل اسبوعين الا يقولي الجلنط الالكتروني علق عليه وهو فالديره وماعنده وكيل !!!
هيا تعال حلها
سحبها سطحه ووداها جده
جاك عند تغيير الزيت المجاني واضطر ينزل جده  وجايك فاالاخير يقول ليه ماخذين فوائد كبيره ؟
وهذا وانا قايله اقرى العقد واعرف كل شي عليك  
يقول وقعت ومشيت !!!

لاحظ اغلب مواضيع الاستفسارات يجيك واحد يسئل ثم فالاخير ياخذ السيارة الي مقتنع فيها ههههههههههههههه

انا شفت كثير خصوصا اللي توهم صغار الاغلب مايقتنع حتى لو سئل وعلى قولتهم ( حب فالراس ولازم يطحنه ) فخل العالم تجرب الا الشخص الواعي والباقي بكيفه



up 0 down 0
شويخ من أرض مكناس 2824
قبل 5 سنه و 9 شهر



عز الله جبتها عالجرح وكنت اتحين الفرصة اني اعبر عن مافي خاطري....
انا متعامل مع الشركة من اكثر من خمسة عشر سنة وعاشق للشروكي والدوج عموما ولكن مؤخرا بدأت الاعيب قطع الغيار ....الزبدة معاي دورانجو 2009 وبعد الفحص قالولي محتاج مساعدات ومقصات ولازم طلبية ورحت لقطع الغيار ودفعت المقدم وحجز للقطعة وقالولي خلال 21 يوم تكون عندك ونكلمك ,المهم طافت الواحد وعشرين يوم وماسمعت حس ولا خبر وكلمت وقالولي انها جت بعضها وبعضها لا وقالي انتظر كم يوم فقلت طيب وانتظرت اسبوع وبعدها كلمت فبدل ان القطع تزود وتجي كاملة صار العكس وقالي ان القطع تأخرت واضطرينا نستخدمها لعميل اخرفكلمت مدير الورشة وقالي معذرة انا استخدمتها لعميل اخر ومادريت انها لك هههههههه فقلت خير والزبدة فقال بكره كلمني قلت طيب طبعا كلمت محد رد وصادف كلمني موظف قطع الغيار واحد اسمه متعب وقالي خلال اربع ايام بالكثير بنندبرلك من الدمام فقلت خير انشالله وكلمت بعد اربع ايام فقال جت وبعدها راحت فانطلقت عليه وقلت حرام عليك واتق الله وانتم عن بكرة ابيكم حراميه وسكرت ورجعت للمدير وكلمته وبعدها ويدق على مدير الورشة وزعيمهم الاخ حسن السوداني وقال مايصير خاطرك الا طيب وقابلته ووعدني وعططاني ارقام القطع وقال رح واحجز موعد بس للصيانة ورحت حجزت الموعد بعد اسبوع على امل ان القطع انتهت ومضمونة وجيت بعد اسبوع وبدخل السيارة الا والموظف في الصيانة يقولي ماش قطع وارجع للشيخ حسن وقلت وين القطع فقالي بعضها معليش راحت وفبالمثل هاوشت وطلعت اصرخ عليه وقدام الزباين وهو يلحقني ويقول بندبرلك وادخل على مدير الورشة مرة ثانية وانا هايج فقالي لحظة ودور بالجهاز قالي ان القطع ركبناها لزبون ثان فقلت وش يعني اجل الحجز والمبلغ المدفوع وهذي قطع من حقي انا وقلت نزلوا القطع الحين وركبوها لسيارتي .....بعدها بدأ تعصبي لهاالسيارات يضعف صراحة من المصخرة والكذب والنصب اللي شفته


up 0 down 0
i grand cherokee
قبل 5 سنه و 9 شهر



السلام عليكم امسيكم بالخير جميعا ،،،

انا مالقيت مثل تويوتا زينه وتوفر قطع غيار وصيانه في كل مناطق المملكه



.
واذا جيت للسيارات الثانيه ماش ماهنا خدمه متكامله كانهم يقولون لك اشتر السياره ودبر نفسك بالصيانه وقطع الغيار مثل الشباب فوق الي يقولون اشتر من الخارج .
وبنفس السياق بسالكم عن فتح محل قطع غيار واستياردها من الخارج ضنكم مجدي اقتصاديا وخاصه ان قطع الغيار مالها تاريخ صلاحيه ولا تحتاج عنايه اللهم ارم في المستودع وانشر اعلانك وامورك طيبه ولا شرايكم يا وجيه الخير


up 0 down 0
فواز ١٤٣٦ 41
قبل 5 سنه و 9 شهر